مغامرة في اعلى قمة في تونس الكبرى: جبل الرصاص

الحال حال شتاء قمت الصباح مالنوم حليت الشباك قابلني جبل الرصاص و بدى حس المغامرة يركبني خاطر طلعتلو برشا مرات و عمري ما خيمت فيه..كلمت زوز اصحابي الي ما يوخروش لتالي.. حضرنا ماتريالنا و تقابلنا.. بقالنا كان الحرس و ادارة الغابات الي كانو حتى في روندوني يخلونا نطلعو بالسيف.. و التخييم الفوق كان مستحيل بش يعطونا الموافقة لذا قررنا بش نطلعو بالسرقة و قصدنا ربي مالبلاصة هاذي اسمها -لافري

مغامرة في اعلى قمة في تونس الكبرى

الطريق صعيب ياسر بسبب ارتفاع الجبل بطريقة رأسية مع رزن الماتريال تكلفلنا الطلوع 600 متر ما يقارب ساعتين و نصف

وصلنا الى نقطة التخييم و اول حاجة عملناها هي لمان الحطب بش نشعلو النار قبل ما يطيح الليل و يفيقو بينا

كملنا شعلنا النار و مشينا عملنا دورة منجم قديم يبلغ طوله 1 كلم تجدون فيه عدة منعرجات منظر جميل جدا في كيفية صقل الحجارة و تكوين بيوت .. منجم ذو صخور براقة تكونت بفعل الماء

This slideshow requires JavaScript.

تبدى المغامرة في الليل .. بدات المطر تصب و جانا السحاب ولات ضباب الدنيا فيلم رعب على حالو .. بدى التهلويس و ولينا نشوفو حاجات تتحرك و حس متع ناس تعيط مالمغاور و هو مفمى شي نسج الخيال .. سهرنا شوية و دخلو اصحابي رقدو دنيا باردة موش نورمال و مالوقت اذاك للصباح نبدلو على بعضنا واحد يرقد لاخر يقوم

This slideshow requires JavaScript.

منظر لتونس الكبرى من فوق جميل جدا كانك عايش في الفضاء.. طلع علينا الصباح لمينا دبشنا و واصلنا للقمة و كانت المهمة الاصعب لذا سلكنا طريق اعرفها اطول ولكن اسهل نوعا ما و هي الدخول الى منجم من الامام و الخروج منه وراء الجبل من ثم التوجه الى القمة.. و احنا في طريقنا قبل ما ندخلو للمنجم نشوفو في قروب روندوني طالعين قريب يوصلولنا سلمنا عليهم من فوق و حبيناهم يتبعونا لكن سلكو طريق اخر الى هو يحتاج تسلق و خطر ياسر.. كملنا طريق الحاصل وصلنا للقمة بعد ساعتين و ركزنا العلم الوطني و القروب وحلو و ما وصلوش للهدف الي حبو عليه .. بقينا نرتاحو و نخططو كيفاش بش نهبطو بالماتريال

الحاصل عملية النزول تكلفت 5 سوايع و نصف و تمت المغامرة بنجاح من غير اي مشكلة و هنا توفى حكايتنا الى اللقاء في مغامرة اخرى 🙂

This slideshow requires JavaScript.

About the author: Yassine Allagui

2 comments to “مغامرة في اعلى قمة في تونس الكبرى: جبل الرصاص”

You can leave a reply or Trackback this post.

  1. Bolbol Mallouli - October 2, 2017 at 10:36 pm Reply

    Bravo

Leave a Reply

Your email address will not be published.