الهدف: أعلى قمة في ألمانيا

سامحونا اصدقائي و صديقاتي بطينا علاكم بش نحكولكم قصة أعلى قمة في ألمانيا، مو تعرفو إلي الدنيا ديمة تلهي فينا هذاك علاش ديمة هاربين منها للطبيعة. لحكاية بدت ملي كنا نقرو … كنا نحلمو و نحلمو و نحلمو بنهار نمشو فيه بن اجبال مغير ما نفكرو ف شي ننصبو خيمتنا وين يطيح علينا الليل و نشعلو النار ، نحكو و نضحكو…. لين شائت الاقدار، كبرنا وكبرت أحلامنا معنا ، تلقينا في كولونيا و من فم حطينا سكانا فوق ضهرنا و توجهنا ل Garmisch-Partenkirchen لجنوب ألمانيا.

وصلنا في الليل … و مشينا للمدخل تع الغابة لي بش نبدو منها المغامرة متاعنا. نصبنا خيمتنا و كنا تاعبين برشة . رقدنا على صوت ساقية صغيرة و هاكي كانت أول حاجة دخلتنا في جو الطبيعة. من غدوة فطرنا وبدينة نمشو في الغابة إلي كنا نشوفو منها فالجبال و نتصورو في روحنا لفوق.

الغابة كانت تقول جنة و الطلعة كانت برسمي تحدي أما مع المناظر المزيانة ما كناش نحسو بتعب. وصلنا بعد جهد كبير لعلو 1705 متر وفم تلقينا مع رجل من إنجلترا كان تتفكروه فالفيديو ^^ قللنا إلي أعلى قمة في ألمانيا مش ممكن نمشولها مالطريق هذا على خاطر الجبال مش لاصقين ببعضهم و الحل يا نهبطو لي طلعناه الكل بش نزيدو نشروا الماكلة لكن نخسرو برشة وقت ولا نربحوا الوقت ونقتصدو في الماكلة و نمشو في ثنية إدورنا على اجبال و نشدو اثنية الصحيحة. هني كان القرار صعيب وكانت أول حاجة عملنا هي انا ثبتنا ف قداش عنا ماكلة.

و برغم إلي شوية شدنا اثنية و قلنا القمة أو لا أحد. من حسن الحظ وصلنا بكري للمحطة متاعنا و طلعت اثنية ليصلحنا بها غلطتنا أزين ملي تصورنا. نصبنا خيمتنا شعلنا النار حكينا ضحكنا و تفكرنا برشة ذكريات وحكينا على أهداف أخرى. فقنا الصباح ناشطين لمينا حويجنا و مشينا … اثنية بدت تولي أزين وأزين وبدينة نطلعو أكثر في العلو لين ولينا في نفس العلو مع السحاب إحساس مش عادي كي تبدا قاعد إنت و صاحبك ترتاح و تجي سحابة وتدخل فيكم ^^ . اثنية ولت بشوية بشوية تتغطى بالثلج والقمة بدينا نشوفو فيها مغطية بسحاب وقلنا القمة ولت قريبة. المرحلة لخرة كانت الأصعب ثلج، برد وإنحدار كبير لكن كانت كل تلفيتة لتالي نعرفو قيمة الجهد لي عملناه. وفي أخر عشرة أمتار زادت شحنة الأدرينالين خاطر نشوفو في الالمان طالعين ب Securité

و أني و صديقي نتسلقو بيد و نصورو بيد. القمة كلمة فيها ثلاثة حروف أما فيها برشة حكايات برشة تعب و برشة جو زادة ^^ . أعلى قمة في ألمانيا كانت أحسن هدية لينا بعد المغامرة إلي عملناها ورحلة متع حوالي 36 كلم مشي. و خذيت عهد أني وصاحبي إلي هذي البداية و مازالت الرحلة طويلة، رحلة في الحقيقة ما عندهاش نهاية أما فيها برشة حاجات  تتحكى … وتوا نخلوكم مع الفيديو

About the author: Dream Hunters

Leave a Reply

Your email address will not be published.