من ذاكرة الطريق : ليلة الضياع

 
طريقنا المرة هذي في ثنايا الوطن القبلي. تفاهمت انا و خويا لبيب باش نعمل “تراك” على نهارين و الانطلاقة من جبل سيدي عبد الرحمن حتى قربص مرورا بواد العبيد. و كان المفروض ننطلقو 10 متاع الصباح.
 
بعد ما مشينا لمحطة لواجات كلمني خونا أحمد عمللنا تحويل وجهة هههه على اساس نمشو معاه هو منظم خرجة لدار لن جاب الله . و كان اول تبديل في البرنامج. مشينا مع سيد احمد و الحق فرحنا و فطرنا حوت ( اباركلك يا غالي ) و المشكل بعد ما رزننا قررنا انو ﻻزمنا نبداو المشوار . خرجنا 15 متاع لعشية و شدينا طريقنا و كان مقرر نعملو كامبينق في واد عبيد بحذا خونا أيوب. متنا بالتعب و احنا كنا مثقلين برشا لين وصلنا بجنب الواد . البحر كان هايج برشا حتى كيف عيطنا بالقوي لايوب ما خرجلنا حد. قلنا مستحيل كان اكون مكمبي في الغابة و اﻻ راو سمعنا. و قتها قررنا نكملو طريقنا و خاصة سمعنا انو أحمد (صاحبنا آخر) مكمبي في قربص قلنا نعملولو مفاجاة و نفجعوهم في الليل كنوصلو.
 
كملنا طريقنا و طاح علينا الليل و بداية المغامرة الفعلية و بدينا نضيعو . لحقيقة ما نعرفوش السيركوي من مرسى الامراء حتى لقربص. حكالي عليه شوية أيمن و قالي كفاش ضاعو فيه اما ما تصورتش باش اصيرلنا هكاكا هههه.
طاح علينا الليل اول ما خرجنا من مرسى الامراء و القرار كان انو ما يلزمناش نحلو اي تورش اﻻ في ظرف خطير.
اول ما طلعنا الجبل كنا باش نضيعو في الثنية في اتجاه بير مروة خاطر رينا ضو مشى في بالنا متاع قرية ” دوالة ” . و بعد استغربنا كتبدلت التضاريس و ولات حرث و غابة !!
 
احنا ضايعين هكاكة و اهدوا علينا ممكن 20 كلب حاشاك ﻻ عرفنا ناقفو و ﻻ نجرو ا هههه . اقفنا شوية باش ستانسو بينا و بعد نسمعو في الحس ورانا … احاحو على الحلوف هههه كسمعو لكلاب مشا في بالهم ينبحو على حلوف. شديناها سبق نجراو قلنا بالك عندهم سلاح زادة.
 
و هدينا على دار مسكين مولاها تفجع كرانا . سئلناه على الطريق قاللنا كملو تو تلقاو طريق. مشينا لين وصلنا مفترق قعدنا نتقزو هه لبيب مشى لليمين و انا لليسار . احنا نتقزو و سمعنا صوت موطور و ما ريناش حتى ضو. كشعلنا التورش تفجع مسكين هههه. قول دلنا قللنا هوكا زيتون خلوه على امينكم و امشاو . بلحرام ظهرت غابات زبتون و ضعنا مرة اخرى و احنا ضايعين شفنا زهمولة كحلا طلعت بهيمة حاساكم حاشاكم. فجعتنا و فجعناها.
 
اخيرا رينا ضو قرية دوالة و بدينا نمشو كيف ما جا الفايدة نوصلو. شوي ﻻ كلينا ريوسنا طحنا في واد ههههه.
وصلنا نلقاو كرهبة قلنا بالك يسترجل اطلعنا الصعدة. وقفلنا و طلع بالعو دوووووودة ههه شوف فينا عبابيث . كقلنالو جينا ى ساقينا من الرتيبة ضحك و قاللنا انس و اﻻ جان هههه
خوكم اول مرة في حياتي نهز كرذونة شراب في يدي ههه خاطر خذيتلها بلاصتها ههههه التعب يا كافر ههه
وصلتا للبطحة وين مدخل قربص جاوونا الامن خداو المعطيات و شاخو علينا ضحك ههه قالولنا مهبلة انتم. برو و سايسو رواحكم.
 
وصلنا نتلبدو باش نفجعو الجماعة ياخي …… ما لقينا حددد ههههه
مالتعب رقدنا ديراكت قومنا اسيم الصباح. و مالتعب ما نجمنا ناكلو شيئ تقريب.
من امتع المغامرات خاصة كتضيع محلاهها هههه
 
مخ الهدرة
– كتبدى معمل باش تمشي مسافة طويلة خوذ الﻻزم و عمرك ما تثقل الوزن على روحك
– حاول ديما تكون عندك دراية مسبقة بالسيركوي باش تكون حاضر للظروف و المفاجآت
– عمرك ما تبدل دبشك و انت مزلت عارق و الطقس بارد. متعت مالموت نهارتها و سترني ربي.
– ديما لقدام و استمتع بالمغامرة و انسى تعبك و ما تتقواش على بدنك. ارتاح وقت الضرورة
– ديما ﻻزمك الماء و حاجة حلوة . بدنك يحرق برشا و ﻻزمك تعوض بالوقت ماكانش اجيك فرتيج و راسك يوجعك برشا و تبدى تلهث.

About the author: Tijani Rkiwa

Leave a Reply

Your email address will not be published.