محمية بوهدمة، أو سافانا تونس في عينين وائل

ولدت في سيدي بوزيد نلقى روحي في بلاد كلها فلاحة و طبيعة مزيانة. جبال و غابات و عيون، و تربيت معها و من اللي صغير. ندور و نطلع الاجبال مع اصحابي من فايض، قارة حديد، عين رباو و المطلق و غيرها من البلايص المزيانين في بوزيد.

لكن كانت ثم بلاصة زرتها في رحلة و نا في عمر 8 سنين بلاصة ما نجمتش ننساها، كانت اول مرة نشوف فيها برشا حيوانات مسيبة مش في قفص. اول مرة نشوف شجرة كيف ما اللي نشوف فيها في البرامج الوثائقية على ادغال إفريقيا. حسيت روحي في تنزانيا و في وسط سافانا لين كنت نخزر يتعداش اسد و الا حمار وحشي، البلاصة هذه هي الحديقة الوطنية بوهدمة من ولاية سيدي بوزيد .

الحب و الحنين للبلاصة هذه خلاني ديما متعلق بيها. و كتب القدر اني في 2015 شاركت في عمل جمعياتي من خلال حملة مناصرة لخلق و دعم السياحة البيئة و الإيكولوجية في ولاية سيدي بوزيد. و من البلايص اللي تخدم عليهم الحملة هي بوهدمة و شيء هذا خلاني نطلع على دراسات و أبحاث على الحديقة وين عرفت بعدها البيئي و التاريخي العظيم من قبل الميلاد الى أيام الاستعمار الفرنسي. عرفت انها اخر غابات السافانا في شمال إفريقيا و انو بوهدمة هي بداية سلسلة جبال الأطلس و اللي توفى في المغرب الأقصى. انو فيها آثار ترجع للعهد الروماني و انو البناية الموجودة فيها ترجع الاستعمار الفرنسي و كانت ثكنة للاحصنة. و وصارت زادة في جبل بوهدمة اهم المعارك و كانت عرين للفلاقة…

التعلق الكبير بالحديقة خلق فيا إصرار -خاصة انو الحملة ما مشاتش مليح- باش نعاود نعمل حملة وحدي و نخلي بوهدمة وجهة لاحباء الطبيعة و التخييم. تجيها الناس من تونس كل و حتى خارج تونس. بوهدمة زادة كانت السبب باش نعمل اول مجموعة للتخييم و التجوال في ولاية سيدي بوزيد و اللي اسمها الڤافلة و اللي من خلالها حبيت ننشر و نعرف الثقافة الإيكولوجية و في نفس الوقت نعرف ببوهدمة من خلال نشر التصاور في وسائل التواصل الاجتماعي. لوين إتصل بيا المغامر ايوب قاسم باش يجي يزور و يستكشف بوهدمة.

بعد الاتصال كنت نقول بعد ايوب زعمة باش يجو مغامرين اخرين يزوروا بوهدمة؟ زعمة تعجبو؟ زعمة زعمة…؟ جاء بحذايا ايوب و كانت فرحة كبيرة اني قابلت مغامر كبير كيفو. اللي كنت نشوف و نتبع فيه كان عالفايسبوك و نحلم اني نقابلوا كيف ما بارشا مغامرين اخرين. بعد ما فطرنا و عملنا قهوة هزينا الترخيص و طلعنا لبوهدمة وصلتوا غادي وين عدى 3 أيام فيها يدور و يستكشف.

بعد ما زار ايوب بوهدمة بفترة كلموني مجموعة من اصحاب أيوب يحبوا يزورو بوهدمة و من بعدها كل مرة تكلمني مجموعة تحب تجي و كنت نحضرلهم الترخيص و نحاول نسهللهم التنقل للحديقة و نخذلهم الطابونة كا هدية صغيرة و نمشي معاهم كا دليل سياحي. و كنت نعمل فيه ما غير مقابل خاطر مش كل الشيء بالفلوس في الدنيا. و انك تعرف بارشا ناس و تاكل معاهم الماء و الملح يدخلوا لدارك يسلموا على امك و باباك و تولي معاهم اصحاب ما تتشراش بفلوس الدنيا الكل.

و اليوم الحمد لله بوهدمة ولت قطب و وجهة لمحبي الطبيعة من تونس كل و اشهر المغامرين جوها و يحبوا يجوها. تجربة بوهدمة علمتني بارشا حاجات إنه مش كل الشيء يتعمل بالفلوس، انه العزيمة و الإصرار يجيبوا النتيجة و النجاح، انه الطبيعة و حبنا ليها ينسينا اختلافاتنا الاديولوجية و الرياضية، انه مجال و غرام ينجم يوحد التوانسة الكل و اهم ما في هالتجربة انه معرفتك في الرجال والنساء الحراير كنوز.

About the author: Wael Jemmali

Leave a Reply

Your email address will not be published.