الهدف: أعلى قمة في شمال إفريقيا

أهلاً بأصدقائي و صديقاتي. المرة هذي نحب نشارككم مغامرة ياسر حلوة فيها برشة جو، تحدي، و برشة أصدقاء جدد.

الرحلة بدات من تونس إتجاه الدار البيضاء. من فم تحولنا على عين المكان لمراكش. المسافة بين الدار البيضاء و مراكش قرابة 250 كم تعدو تقول 5 كم. أكثر لحكايات يبدو بنكتة ولا ضحكة و هاكا لي صار؛ و أحنا قاعدين في Cabine تع Train نحاولو نتبردو ب Climatiseur قمت كلفالح نتكوبس عالباب بش نسكره محبش يتسكر حسيتو قديم ومنتكونسي…  يتعدى وحيد ضعيفون داخل ملشوباك  بعد الValise مثنية و تلفت على حسن نيته لقانا فدين مسخانة جبد الباب بصبعة الصغير سكرة من فم ترشقو جماعة بضحك و وقتها بدت برشة حكايات كملوا كان في مراكش.

تعرفنا على David و Natasha و حنان من مراكش و بقات تقوللنا علبلايص المزيانة في مراكش. David كان نبار كبير أما Version Anglais و Natasha نسحابوها ما عندها في السوق ما اذوق طلعت عاملة Base Camp 1 تع Mount Everest. سيبنا كل شي و شادينها هي ^^

وصلنا لمراكش و فم لقينا عزالدين صديق ال Couchsurfing يستنى فينا. بالنسبة للعباد لي ما تعرفش ال Couchsurfing: هو عبارة على موقع تعمل فيه compte و أي voyageur يبدا متعدي مالبلد لي ساكن فيها إنت يكتبلك message privé يقلك تنجم إضيفني في periode فلانية ؟ كان تنجم اضيفوا ضيفو و تتعرف على عباد جدد و مغامرتهم si non مش مشكلة

و نفس لحكاية طبقناها أما بالعكس مرة هذي ضيفنا عزالدين و حكلنا على برشة مغامرين جو بحذاه و دار بينا مراكش و عطانا برشة من وقته. تحية خاصة ليه. لعشية هزنا عزالدين لساحة جامع لفنا و هي تنجمو تقولو من أشهر لبلايص فالمغرب. فيها برشة عروض تع أغاني محلية و خاصةً أكلات بنينة. حاصل كلينا لين ولينا نتنفسو بسيف و كلمنا David و Natasha عملنا معاهم قهوة ف Café de France. ننصحو كل واحد يمشي للمغرب بش يركش فيها خاطر تجم تشوف المنظر المزيان تع ساحة جامع لفنا من فوق و إنت تترشف في شاي مغربي يعمل الكيف.

من غدوة حضرنا Materiel الجبل و توجهنا لقرية إمليل جنوب المغرب و من فم بدينا رحلة الصعود لقمة توبقال. توبقال هو أعلى قمة في شمال إفريقيا و في سلسلة جبال الأطلس ليتبدا مالمغرب و تكمل في تونس علو القمة 4167 متر و الطريق لها طويلة برشة و تتم على 3 مراحل:

1) إمليل – شمهروش

2) شمهروش – Refuge

3) Refuge – القمة

اثنية فيها بلايص ساهلين و بلايص تكون فيهم الصعدة صعيبة نوعاً ما. المرحلة 1 و 2 عملناهم في نهار وصلنا لل Refuge تعشينا كرينا 2 Tentes و بنتنا فيهم بحكم عنا بقية اللوازم. فقنا الصباح بكري و قصدنا ربي للقمة؛ المرحلة 3 هي أصعب مرحلة يكون فيها 70% مال Effort physique.

لحظات تأمل فوق قمة توبقال كانت ثمرة تعب كبير!! رجعنا لل Refuge. رتحنا و قررنا بش نباتو فم خاطر كنا تاعبين. صباح إنهار 3 هبطنا من توبقال و رجعنا لمراكش من جديد. عطش الجو والهملة ما خلناش نرتاحوا حتى نهار. من غدوة حظرنا روحنا و مشينا ف Excursion ادوم 3 أيام فيها زرنا برشة بلايص مزيانة في جنوب المغرب كما Ouerzazet ،Gorge Dades ،Ait Ben Haddou ،Kasbah ،Gorge Todgha ،Sahara في Excursion

تعرفنا على حضارة البربر و علاقتهم بالعرب و النوماد و تمتعنا بغروب و شروق شمس في الصحراء. كملت المغامرة بشوي ذكريات من ساحة جامع لفنا و فم كانت أخر عشوية مع عزالدين و اصدقاءه و Cuba و Patricia؛ Couple جايين من بولونيا Hichhiking و مضيفهم عزالدين عن طريق Couchsurfing.

و باللي نحاول نكتب كل شي يبقى ديمة وصفي جزء من الواقع و المغامرة ليعشنها. حط ساكك فوق ظهرك و لبلاصة ليتنجم تمشيلها إمشيلها. مش لازم برشة فلوس بش تعمل مغامرة مزيانة حتى Budget صغير تعمل لعجب كيف تعرف كيفاش تتصرف فيها و تكون إجتماعي. اصدقائي نفرحو برشة كي نشوفو شكون motivé و يحب يعمل défit. عملناه و نجمو نعاونوكم قد ما نقدرو. وتوا نخلوكم مع الفيديو إلي إلي حاولنا نلخصو فيه مغامرتنا المزيانة…

#Dream_Hunters

About the author: Dream Hunters

Leave a Reply

Your email address will not be published.