جو التبسكيلة على إمتداد الوطن القبلي

لحكاية بدات عندها فوق العام و انا نحب نعمل تور كاب بون. قعدت نستنى فالفرصة وقتاش تواتي التبسكيلة… و في لحضة بدات 9 سبتمبر 2017 نهار السبت في الليل. ركبت و تأكدت “لي الفرصة عمرها ما باش تجي وحدها” قلت نخلقها وحدي…

كلمت صاحبي حمزة: اشرايك نعملو تور غدوة الاحد 10 سبتمبر 2017… مهمه شوية و قلي نتوكلو على ربي و هذاكا لي صار حضرنا زادنا و زوادنا و كيف كل مرة نتعدى لنبع الحنان نخليلها معلومة إلي انا خارج و كيف العادة . نفس الموال” الله لا يحرمني منك”. الوالدة ماشي على بالها نهار و نروح. الحاصل توكلنا على ربي نهار الاحد 10 سبتمبر 2017 الصباح بكري بالرغم لي ناقصني “chambre d’air” اما قلت منفزدش بروڨرام نستنى فيه عندي قداش…

نتوكل على ربي و ان شاء الله مايصيرش الخايب … لنا تأكدت لي “كان ماتخوش الريسك عمرك ما تنجم تقدم خطوة و تذوق بنت الحياة لي تربحو في الريسك اكثر ملي تخسرو فالخوف”… حاصل خرجنا مالدار و المطر تبخنس 6 متاع صباح و شدينا طريق لبوعرڨوب وين فطرنا فطور نصف نهار ال10 تاع الصباح. قابلنا الاصحاب و الاحباب من بينهم mohamed salah hassen و واصلنا الطريق لنابل… الطقس كان مطر و ريح. تعبنى شويا الطريق و الطقس اما قاومناه بالموزيكة و العنب لي شريناهم من طريق. اما اكثر حاجة تشجعك وتعطيك برشا motivation المعاملة متع الناس فالطريق… يحسوك لي انت تعمل في حاجة بنينا عللخر كيف ترى و تسمع التزمير و الكلام لي تقال تفرح برشا إلي فما ناس تقدر غرامك. فما إلي عيط بالصوت العالي… (Allez courage courage) و يعطيكم الصحة و برشا كلام بنييييين علللخر.

وصلنا لنابل عملنا دورة مزيانة فالبلاد و بعدين قعدنا عالplage نخممو وين باش نباتو في طقس ما يشجعش على الكمبينغ (برشا ريح و مطر) كلمة عشيري momo لي اول ماقتلو وين نجم نبات في دار شباب في نابل قلي ايجى بحذاي لدار و كيف كيف الغالي bilel لي هو في زغوان قلى برى بات في الدار. الله يباركلكم لصحاب و لحباب الكل و يدوم الخير و العز عليكم… حاصل بعد برشا تخمام قررنا نطلعو لبني خيار فما غادي دار شباب و احنا في الطريق يعرضنى احلى كوبل boulboul و fadiya لي نعتنى على سونتر كامبينغ في المعمورة و قعد يوصي و يعاود كان ملقيتوش وين تباتو كلموني … Boulboul ربي يبارك فيك صاحبي و في شبابك…

وصلنا للمعمورة نعتونا لعباد على السونتر ياخي طلع كشافة. و مانجموش نباتو غادي. قام idriss قال تو نوصلوكم لسونتر كومبينغ موش كشافة .سي idriss و صاحبو مغرومين بالبسكلات … اكهو وصلونا للبلاصة لي باش نباتو فيها غادي كرينا ليلة في بيت 5د. لي خلاني نحبها البيت هذي هو البنيا متاعها ستيل لفريك تحس روحك في جنوب افريقيا.. طيبنا عجتنا و سهرنا على قهيوتنا و رقدنا لصباح… نهار الاثنين 11 سبتمبر 2017 شدينا الطريق لتزركة وين عملنا شوية تصاور و كملنا لقربة رتحنا فيها و احنى نحررو في الوقت باش نطلعو بحذى عم moez لمنزل تميم بعد الترتيحة و تقهويجة في قربة احنى. في الطريق عاملين كيف و نقصرو في الطريق بالموزيكة و بحكم الريح معادش مقابلنا ولا على جنب اكيك و طف ههههه سقط رامي فالبرميل و تزلق بيا البسكلات و نطيح نجي ماد لربعة. الحمد لله جات باللطف اما ليد لي طحت عليها مقلقتني شوي… اما قمت واصلنا الطريق لشط الزهور وين قيلنا في القهوة و بعدين واصلنا لمنزل تميم.

في منزل تميم قابلنا عم moez إلي فرح بينااا فرحة ماتتصورش… هزنا للمقر وشربنا التاي تع منزل تميييم وين حكالنا برشا حكايات مزيانة على غرامو بالcyclotourisme و رحلة المحبة لي شملت المغرب العربي (تونس – الجزائر – المغرب – موريطانيا) حتى كيف حكيتلو على الطيحة متاعي فالطريق قام بالواجب و زيادة ربي يبارك فيك عمو… هزنا لصديقناا seif إلي ضيفنى بقهيوة بنينة و طمني و قالي لباس ان شاء الله و هو بيدو قعد كل مرة يطمن عليا… الحاصل كيف رجعنا للمقر زاد ضيفنى بعشاء يعمل الكيف طريح مقرونة باللحم والله ناس الخير و الدنيا ب 100000 خير غير التلافز و القنوات و الاعلام التونسي يمسخلنا في الفكر متعنا…

بعد لعشاء عطانا الجراري وين شنرقدو و في الوقت هذا انا يدي تسطر عليا علللخر مع العشرة متع الليل يدي منجمش نحركها و زيد تنفخت و نخمم في نهار إلي بعدو كيفاش باش يتعدى. حاصل شديت بلاصتي باش نرقد اما ما رقدتش خاطر يدي توجع فيا وجيعة خايبة و زيد شوية سخانة ل4 متاع الصباح. لنا تذكرت كلام ربي ((مثلُ الجسد، إِذا اشتكى منه عضو تَدَاعَى له سائرُ الجسد بالسَّهَرِ والحُمِّى)) وليت نخمم في المروح لتونس في اللواج فالوقت هذا. برشا ڨلڨ برشا تخمام من ناحية التور باش يطيح في الماء و من ناحية يدي توجع عللخر وجيعة تبكي… قلت على ربي بين ساعة و ساعة ربي يفرجها ان شاء الله الصباح نروح لتونس… رقدت ساعة بالوقت و قمنى لفطور الصباح في نهار جديد نهار 12سبتمبر. تسلم يديك عم moez على القهوة و الحلو. بعد قهوة الصباح في نسمة الصباح البنينة قصدنا ربي مشينا بحذى صاحبنا الغالي seifeddine لي عطانا من وقتو و دورنا نلوجو في بروتج ليدي.

مالقيناش ياخي عطاني لي عندو لي عمري ما ننسى وقفتو معايا إلي ساعات اقرب الناس ليك مايعملوش معاك هكا. لنا رجعت لكلام الوالد كيف قالي سنين لتالي “معرفتك في الرجال كنوز”. حمدو لله مازال برشا خير في الدنيا .ان شاء الله ربي يكتبلك الخير و السلامة و كل ما تتمنى سي seif وان شاء الله نتقابلو في ساعة سعيدة و نرجعلك شطر لي عملتو معايا… بعد ماركبت البروتج نجمت نبسكل اما بيد وحدة و اليد لوخرى مسايسها لاقصى درجة خاطر مزال 70٪ في التور. وصل معنا عم moez لقليبية ونسنا في الطريق و غادي وين عملنا صورة تقعد تاريخ و تتسجل في الذكريات و تفرقنا. عم moez رجع لمنزل تميم و احنى واصلنا لقليبة وين عملنا دورة مزيانة و طلعنا حتى للبرج و تعدينا لبرشا تراكن يفتقو. الحمدوللله والله تونس ياسر مزيانة…

حبينا نتحيلو على الطريق و نختصرو نلقاو رواحنا في هنشير الناس ندورو على بلاصتنا و نلوجو على الخروج للطريق الرئيسي. سلكناها و شدينا الطريق لواد لقصب وين حمزة ركبتلو على تبحبيحة و عمل غطسة وين انا مطيش تحت شجرو للظل نرتح خاطر مزال قدامنااا طريق للهوارية المزيانة… اول ماوصلنا للمدخل تع لبلاد قلنا نرتحو في الظل شوية وين ربي سبحانو بعث رزقو. زوز صغار على موتور وقفو علينا. قالولنا تاخذو بطيخ و دلاع هههه قولتلهم قداش الكعبة قال بلاش. الله يبارك فيهم بعد تعب و تدوير يجيك رزقك ليديك… كلينا و رتحنا و تعدينا للبورط وين عملنا برشا تصاور و راجعين للڨروط خاطر صاحبي ahmed rayen يستنا فينا…

خرجنا مالبرط طالعين للڨروط و الشمس بدات تغيب. Donc coucher de soleil مايتفلتش وقفنا صورنا و فتقنى روحنا تصور لين ضلامة الدنيا علينا. سهلنا على resto la source ناس الخير دلونا و وصلونا… مانحكيلكمش على المعاملة من طرف عائلة خونا بوحميد… ساعة جات الولدة الله يفضلهالو قعدت تحكي و تنصح فيا على يدي. محليها عللخر اكا الضحكة و التبسيمة اصلا ترتاح نفسانيا من قبل ماترتاح بدنيا… فرحو بينا فرحة ياسر بنينا… السلاطة و السكلوب و الملوخية و السلاطة مشويا و الڨازوز و التاي و العصير و الخيرات ان شاء الله ربي يدوم عليهم العز و الفرحة ويبارك في الصحة و الخير…

بعد ما سهرنا و رتحنا و تفرهدنا شدينا الفروشات حضرنا بروڨرام نهار 13 سبتمبر. كان نهار غير ليام الكل اول حاجة فيه انو اخر نهار في التبسكيلة و لازم نعملو الهوارية تونس و في نفس الوقت مازال برشا تراكن يلزم نتعداو عليهم… برى قولنا مولاها ربي نتعداو للبلايص لي في بالنا الكل وقت لي نوصلو نوصلو و هذا إلي صار. بدينا بسيدي داود و تعدينا على بير جادي وين رتحنا عملنا طريح “كسكروت هريسة و تن” و ڨازوزة و وصلنا الطريق… و احنا ماشين بالبرانسيب (اذا واتت حلات). بعد لفطير شدينا الطريق و كل مرة تعرضنا صعدا اكسح من اختها و انا انمني في روحي هاذي اخر صعدا. و تطلع مزال بعدها ما اخيب منها. بالڨليب و العزيمة سلكنيها و كملنا تور الكاب بون و انا واحد من الناس كملت التور بيد وحدة. برشا فرحة و برشا بنا…

صحيح إلي غيري عامل حاجة اكسح مني اما انا فرحان علخر خاطر بالرسمي حبيتها و حبيت نكملها و حبيت نعمل بركور يقعد. لي نحب نوصلو لناس البركور موش سبونسورزي. و انا بطال معناها مانخدمش. وزيد ماعنديش حد يمولني. معنيها 50 دينار و تتسما صرفت برشا. لي تعلمتو في البركور عمري لاقريتو لا في مدرسة و لا في ليسي و لا في فاك. إلي ريتو و تعلمتو اقوى ببرشا ملي قراوهولنا وإلي يزرعو فيه في مخاخنا. نصيحتي ليك يالي قاعد تقرى في كلامي لي عملتو و انا بطال ماعملتوش و انا نخدم. موش قصدي تبطل خدمتك و تهمل لا لا قصدي مافما شئ صعيب. نضم وقتك و عيش الحياة…

الناس ياسر محليهم. الناس تحن عليك و تحب البراني و تشجع… مازالت الرحمة في قلوب البشر ليوم الدين… ما تصعبهاش على روحك. انا التور كانت حلمة و ولات حقيقة و كيف نتذكر إلي صار نفرح برشا. طعم الحياة عمرو ما كان قهوة و سهريا و بواطا و ديسكو. طعم الحياة انو ترى و تخالط و تعرف ناس كيفاش تعيش. تكتشف… تعيش لروحك. حط حلمة صغيرة و اخدم عليها غدوا تولي كبيرا… توكل على ربي ماتسمعش النڨاتيف و متخالطش الفشل. جرب مرة و اثنين و ثلاثة و زيد تو تخطف. كون انت كيف ما تحب انت موش كيف ما يحبوك تكون.

البركور كان من : الجديدة – تونس – ڨرومبالية – نابل – بني خيار – المعمورة – تزركة – قربة – شط الزهور – منزل تميم – قليبية – واد لقصب – الهوارية البرط – الهوارية الڨروط – سيدي داود – بير جادي – تكلسة بورت او برانس – سليمان – تونس – الجديدة… الكل 370 كلم. الحمد اللله هذا الكل من فضل ربي و إلي جاي خير ان شاء الله

‏”لا تنتظر حتى تصل لهدفك لتكون فخوراً بنفسك، كن فخوراً بكل خطوة تتخذها.” – كارين سالمانسون

About the author: Mohamed Ben Nouioua

Leave a Reply

Your email address will not be published.