إلي عشتو كيف بسكلت من تونس لجربة

و لست من من يترك أحلامه أو يتخلى عنها

المرة هاذي باش نحكي على ناس الساحل و جو الساحل المزيان <3
بعد تور الكاب بون إلي دامت من 09 لحد 13 سبتمبر 2017 جا الوقت باش نحكي على تونس جربة لي دامت من 11 لحد 15 أكتوبر 2017.

صحيح الحكاية طويلة شوي اما كيف كل مرة نحب نعيشكم معايا المتعة و نحطكم في اطار المغامرة. نهرب بيكم شوي من عالكم لعالمي… ان شاء الله تعجبكم 🙂

وكيف كل مرة نبدى بنبع الحنان الله لا ينحيهاا عليا. ماشي فيبالها حدي سوسة بحذا ولد خالي في نهارين و نروح ياخي روحت لجربة. لا يحرمني منك يا غالية…
الحاصل لحكاية بدات نهار 11/10/2017 وين خرجنا من تونس 6 متاع الصباح في طريق سوسة اول ترتيحة كانت كيف العادة في ڨرمبالية الطريق طويل و الوقت قليل لازم نرتاحوش برشا باش نوصلو بكري شوية… بعد ڨرمبالية شدينا الطريق الحمامات. رتحنا بحذا العم عبد القادر في بوفيشة غادي وين اول انسان بدات حكاية الفرحة معاه على اساس باش نطيبو حاجة خفيفة ياخي قلنا ارتاحو مالسفر تو نقوم بالواجب و بالرسمي قام بالواجب و زيادة… غادي وين قالي اعطيني شعندك مديتلو الطماطم و الفلفل و البصل و عجعجلنا فايم بنين و زادنا الفريت. سبحان الله إلي رزقنا الفرحاااا في ابسط الظروف.

غادي وين رتحنا بالباهي وين فرح بينا العم قدور. العم عبد القادر راجل كبير طيب و ظاهر على وجهو الخير. شيخنا دعاء. بعد ما كلينا و ارتحناا و تفرشكنا شدينا الطريق لسوسة. الطريق ماشي و يطوال و التعب ماشي و يزيد و الكياس ماشي و يضياق… اكثر حاجة تعبتنا الكماين تاع السلعة وقت لي يتعدا بحذانا ينفخ نفخا خايبة. برشا ريسك فالكياس اما بين عينيناااا حلمااا وحدة هيااا الوصول لسوسة… بعد الكرفي كانت ترتيحة في النفيضة مع 16h معنيها مزال 52 كيلو تدوير. حاصل شدينا الطريق لسوسة و طريق عمال يتعبنا اما لازم نوصلو لسوسة خاطر حمة ولد خالي يستنا فينا مالصباح ماشي في بالو جاي على ميكانيك. الحاصل الساقين بدات تتعب و الموسكل ماشي و يتكبس و الليل ماشي و يطيح. وصلنا لسوسة 20h.

لبدن تعب اما الفرحة عوضت التعب 177كيلمتر في نهار في طريق كل اشغال و كماين. الحلما بدات تتكتب على الطريق. الحلما. ماشيا و تتحقق. من بعد  177كيلمتر تأكدنا إلي نجمو نعملو في النهار 100كيلمتر و نوصلو لاباس. الحاصل عرضلنا حمة إلي فرح بينا و ضيفنا في دارو و هو عروس السنا. الخيرات السبعة موجودة مالسباڨيتي فروي د مار للبيزا للسلاطة المشوية والله ربي ينورك ياغالي حتى احنا تڨطعنا في الطريق ههههه هذا نهار مالحلمة وفا على خير و برشا عز.

نهار 10/10/2017 قمنا في راحتنا خاطر الوجها متاعنا كانت طبلبة 40 كيلمتر. عملنا قهيوة الصبحية في سوسة و حمة يڨنڨن زيدو شوي زيدو شوي. على حساب ولد خالي اكهو يزي تونس سوسة فيه البركة لاينحيك عليا يا غالي و بعد كلمتني الوالدة كيف العادة. هيا مروح!! هاك وصلت لسوسة روح يزي… يباركلك يا لميمة و انا كيف العادة قلتلها هاني نوصل لطبلبة و المهدية و نجي. الحاصل قصدنا ربي 11h للمنستير وين فتقنا رواحنا تصاور و فطقنيها البلاصة وين فطرنا و قهوجنا و رتحنا بالباهي و قابلنا اصحابنا. لعشيا شدينا طريق طبلبة. من هنا قبلنا capitano لمدليل إلي فرح بينا فرحة خاصة خلينا فالقهوة و مشا يجيب فيالحوت الفرشك مالبرط. يما عالعز اما طلعنا لدار رتحنا شعلنا الكانون و بدات المتعة تع الحوت المشوي. الحوت من بحرو. بعد العشاء افعل ما تشاء. شدينا السطح وسهرنا لنصف الليل ليلة محليها برشا ضحك و تفدليك.  لحاصل رقدنا 00h خاطر الطريق النهار الثالث طويل شوية.

نهار 11/10/2017 قمنا 5h متاع الصباح باش نخلطو على شروق الشمس و متعت الساحل في شمسها. شروقها و غروبها. قام صاحبنا capitano وصلنا شوية في الطريق ربي ينورو على الليلة إلي تنقشت في الڨلب وشدينا الطريق للمهدية عن طريق الشط. منظر ولا اروع وصلنا للمهدية شربنا قهيوة الصبحيا في مقهى لفريك و برشا تصاور فالمدينة العربي. بعد دخلنا في متعت الطريق القاحل. طريق طويل دور دور لين وصلنا لقصور الساف وقدر ربي مع 13h احنا في الجم بعد 50 كيلمتر. غادي فطرنا 20 دقيقة. وصلنا التلفون من عند لحنينة. ايا وينك مروح لتونس؟؟ قلتلها ممكن غدوة اما راني فالجم نوصل لصفاقس و نرجع. نصبر فيها كيف العادة باش متحسش الطريق طول و تتحير. المفيد شدينا الطريق لصفاقس. في شطر الطريق رتحنا و دسرنيها بالرمان. و هبط شوية تصاور على البروفيل لنا بضبط وصلني كومنتر من عند صديق معايا على الفيسبوك اما عمرنا ما حكينا قلي اول ما توصل لصفاقس كلمني. خليتلو نومر على البواط ميساج خاطر ندور. لحاصل وصلت لصفاقس بعد 70كيلمت. كلمني صاحبي hichem. تلاقينا و ضيفنا على طريح جواجم و بعد وصلنا لدار الشباب بعد ماقرقنا بيه خاطر شد صحيح باش نباتو بحذاه فالدار. حاصل ركحنا لمور في دار الشباب و رجعلنا بولهش فرح بينا فرحا غير عاديا. نذكركم لي احنا عمرنا ما تقابلنا و ماحكينا كان كيف شاف التعليق على الصفحة. دورناا في صفاقس في الليل بالمتور و عرفنا على صحابو و قهوجنا و تعشينا و 23h وصلنا لدار شباب مرة اخرى.

نهار12/10/2017 توكلنا على ربي من صفاقس لڨابس. غادي وين حطينا في قلوبنا باش نوصلو بكري. ضربنا  40كيلمتر من غير وقوف. تڨطعنا تدوير اما يلزمنا نوصلو بكري لا يطيح علينا الليل خاطر طريقنا طولو  175كيلمتر. الحاصل حب ربي نطيح بان بعد  40 كيلو على صفاقس. وين حنت علينا زيتونا بالظل متاعها و ركشنا تحتها و بدلت لي لزم يتبدل و واصلنا طريقنا. لين وصلنا للصخيرة 13h. فطرنا و رتحنا 30 دقيقة و مانحكيلكمش على الريسك متاع لكماين و على حالت الطريق اما الحمد لله تعدات سلامات. طريق طويل و الشمس قويا و البدن ماشي و يتعب و النهار ماشي و يوفا و الحلما بين العينين كبيرا.  برشا تعب اما الارادة تغلب الكل. وصلنا لڨابس عرضنا صاحبي و عشيري الغالي شهاب لي يستنا فينا من 15h باش نوصلو. حاصل احنا نلقاو اولاد يبسكلو قام واحد قال: هذا نعرفو على الفيسبوك اسمو موحا. اي قتلو سلفي على الفازة هههه. و طلعنا مع صاحبنا شهاب لدارهم وين فرح بينا هو و العايلة و الاصحاب ربي يباركو عشير عمري. نلقاو المقرونا و السلاطة و الخيرات. و في ليلة ڨابس عملنا دورة في الواحة و في الليل و سهرية ديمينو لحد 00h و شدينا بلايصنا خاطر النهار لي بعدو عنا مشيا باهيا طريق جربة. الحلمة ماشيا و تبان الحلمة ماشيا و تتحقق. القلب فرحان. البركور لحد الساعة لباس علخر. العين قريب تدمع.

نهار 13/10/2017. النهار هذا اسعد ايام حياتي. بعد مافطرنا بحذاا شهاب شدينا الطريق لجربة. الحلما قعدت فيها كان 10٪ يارب يعديهم على خير. اول الطريق دخلنا لمتحف العسكري في مارث و بعد توكلنا في عز الشهيلي. و احنا اكيكا وقفنا في قلب الطريق خاطر منظر ما يتفلتش. البلاصة هذي سمينها Texas. طريق طويل. على اليمين خلى و اليسار كيف كيف. قد ما تمد عينيك طريق مايوفاش. و في عزها نلقاو الذهب يماا هلى الذهب (الذهب هو صنتاج متاع مااء). غادي صاحبي حمزة قلي هذي متع دوش. مارجعنهاش لتاليي و حطينا بساكلنا و حوايجنا و حلينا الماء و عملنا تبحبيحا ياسر متع. بعدها بالضبط يطيح عم الراجل بالكميونا بان. دزينا معاه لين خدمت. ودناا ببرشا بلح نرجعو بيه السكر لي كلاتو البسكلات. الحمد لله مازال برشا خير في الدنيا. على هذا قلت اسعد نهار في البركور.

مازال العز و الخير. بعد هذا الكل و قبل اجي ب20 كلمتر نسمع في صوت يعيط محمد. تلفت قلت بالك نستخايل. و الصوت عاود مرة اخرى. تلفت نلقى صاحبي رياض فوق ال10سنين ماتلاقيناش. وحب ربي باش نتلقاو بعد  10سنين في اخر تونس. مع العلم نسكنو في نفس الولاية “ولاية منوبة”. قعدنا في لخلا حكينا برشا حكايات و تحسرنا على برشا سنين فاتت و وصلنا طريق لين وصلنا لجرف.

مع 15h احنى في الجرف ماقعد كان 2٪ على جربة. 98٪ مالحلمة تمت الفرحة دخلت القلب و العين دمعت و المخ يخدم و يشكر في المولا سبحانو على المتعة و على العز لي راه في الطريق. انا لي كنت قبل نقول لا منجمش و منعرفش و كيفاش تونس جربة على بسكلاة. ليوم جيت من توتس لجربة على بسكلات 26″. انا لي كنت شاد القهوة ليل و نهار و محروم من برشا عز. انا لي كنت نقول ياخي مهبول باش نمشي بالبسكلات لجربة. ليوم انا نفتخر لي انا مهبول و مشيت لجربة بالبسكلات. انا و صاحبي حمزة لي عمرو ما رجعهااا لتالي.

حاصل طلعنا في البطاح و تلفتنا للجرف و قلنالو ملتقانا في المرواح. دخلنا اجيم و نلقاو خونا صاحب حمزة يستنا فينا وصلنا لي الدار متع صحبنا. و لنا حوار صار بيني و بين حمزة في كلمتين:

قتلو: اه صاحبي وفات ؟
تبسم و قالي : وفات

لنا احساس مخلط بين برشا فرحة و بين الرحلة وفات. معنيها الحلمة وفات. التدوير وفا. البسكلات قامت بالواجب و زيادة. لنا عز و حسرة و متعة و حيرة. تمنينا نكملو. اما حلمتنا كيف سطرنيها حدها جربة. الحمد لله الحلمة تمت. الحلمة تحققت. برشا ناس محليهم. برشا حكايات تحفرت في الڨلب. مع كل تدويرا برشا احاسيس تحست. 5 ايام ولا في الاحلام. العبرة مالرحلة في الناس لي قابلناهم و الطريق الواعر لي تعديناه. ناس ماراتش عين. الخير لي فيهم. اخرج شوف الدنيا محليها و ناسها مبهاها و قلوب مطيبها. اخرج سيب التلفزة. عيش و اعرف تونس. ناسها محليهم غير لي نراو فيه في التلافز. العبرة و الفرحة في المدة لي تعديها في الرحلة و المتعة لي تعرضك طول الطريق. ننصح اي بشر يجرب مايخافش. الحياة مرة. يا تعيشهاا بعزها و متعتها و مغامراتها. يا بش تعيش كيف جميع البشر الحياة الروتينيا. قهوة دار. جرب متخافش. قدم متوخرش.

قد تظل أثناء السفر صامتاً لوقت طويل، لكنه يجعل منك فيما بعد راوياً للقصص

حكايتناا دامت 5 ايام. كفاتنا باش نتحداو رواحنا و نعيشو المتعة  في 615 كلمتر. بدينا من : الجديدة – تونس – ڨرمبالية – بوفيشة – النفيضة – سوسة – المنستير – طبلبة – المهدية – قصور الساف – الجم – صفاقس – المحرص – الصخيرة – العكارية – ڨابس – مارث – الجرف – اجيم جربة. و في اخر الحكاية نحب نتوجه بكل الشكر لاكثر اناس كان معي برغم بعد لمسافة و يمتيفي فيا. ومتبع اخباري اول باول و نقلها ربي يجزيك كل خير على قلبك لكبير (masha)
و نشكر الناس لي حبو يضيفونا و ما واتتش الفرصة. و الناس لي سالو علينا و تبعونا و تبعو تحركاتنا. و الناس لي كلمونا وقت لي تحيرو علينا. و لي دخلو الفرحة في قلوبنا حتى بمساج على الفيسبوك و الكومنت المزيانين كيفكم. و الناس لي شجعونا بالكلام و الناس لي عطاو من وقتهم باش تلاقينا. و الناس لي ما تلاقيناش معاهم ان شاء الله لي جاي خير. برشا حب مني ليكم و برشا معزا و برشا احترام…

هذي حلمة اخرى من بين برشا احلام و تمت بنجاح. تقعد فالڨلب على طول لعمر و الكل من فضل ربي سبحانو و القلوب لبنينا و ناس الخير. ان شاء الله لي جاي خير و احلى برشا. ان شاء الله في افونتر جديدة على قريب #ديما_القودااااام

About the author: Mohamed Ben Nouioua

Leave a Reply

Your email address will not be published.